Wala nangin upang ang snowstorm para sa mga South Korean protesters nga nagapanawagan nga maaresto si suspended President Yoon Suk Yeol.
Ini ang kasunod sang kapaslawan nga maaresto si Yoon sa diin indi magnubo sa 48 ka oras ang nabilin antes ang pag-expire sang warrant.
Matandaan nga ginbutang ni Yoon ang South Korea sa political chaos sang nagligad nga bulan kasunod sang iya pagdeklarar sang martial law.
Suno kay Bombo Danah Vasquez, international correspondent sa South Korea, indi mahapos ang pag-aresto kay Yoon bangud sa ginatos ka mga loyal security officers nga nagapamalabag sa pag-aresto sa iya.
Nahibaluan nga napuno sang mga protesters ang mga mayor nga dalanon sa Seoul matapos napaslawan ang pag-aresto sa diin ang isa ka grupo ang naga-demand sa pag-aresto kay Yoon, samtang isa naman ka grupo ang nagapanawagan nga ideklarar nga invalid ang iya impeachment.
Ang rally sa tunga sang snowstorm ang kasunod man sang pahayag ni Yoon nga nagalantaw siya sa livestream sa YouTube sa mga nagasuporta nga ipakigbato ang natabo nga pag-agaw sa iya gahom.
Nagapangatubang si Yoon sang kaso kriminal nga insurrection, isa sa pila ka mga krimen nga indi sakop sang presidential immunity, buot silingon, mahimo ini nga mapreso kag ang pinakamalala amo nga masentensyahan ini sang death penalty.
Sa tion nga ma-execute ang warrant, si Yoon ang mangin pinakauna nga sitting South Korean president nga maaresto.
