Nag-convene ang Kongreso sa Estados Unidos sang Amerika agud isipon ang boto sang Electoral College kag pormal nga kilalahon ang pagdaog ni President-elect Donald Trump sa 2024 presidential election.
Mismo si Vice President Kamala Harris, nga napyerde kay Trump sang Nobyembre 2024 ang nag-preside sa joint session sang Kongreso sa diin nagaserbe ini nga president sang Senado kag mismo nag-anunsyo sang resulta sang mga piniliay.
Nagdaog si Trump pinaagi sa 312 ka electoral votes, samtang si Harris naman ang may yara lang sang 226.
Wala naman sang objections sa chamber sang gin-anunsyo ang resulta sang piniliay sa kada estado.
Ang pag-anunsyo sa kadalag-an ni Trump ang kadungan man sang nagakatabo nga winter storm sa Amerika lakip na ang Washington, D.C., sa diin sirado ang mga federal kag local government offices.
Matandaan nga apat ka tuig na ang nagligad sang natabo nga pag-atake sa US Capitol matapos nag-riot ang mga supporters ni Trump sang nalutos ini sa eleksyon sang 2020.
Masobra naman sa 1,500 ka mga indibidwal ang ginsentensyahan bangud sa ila kaangtanan sa pag-atake sang January 6, 2021, sa diin ginpromisa ni Trump nga hatagan ang mga ini sang pardon sa tion nga makapungko na ini sa iya ikaduha nga termino.
