𝗜𝗟𝗢𝗜𝗟𝗢 – May tatlo na ka mga kandidato sa Western Visayas nga nag-apply para sa exemption sa election gun ban.
Ang nationwide gun ban ang maumpisa sa Dominggo, Enero 12, nga amo man ang umpisa sang election period para sa May 12, 2025 elections.
Sa interview sang Bombo Radyo kay Police Brigadier General Jack Wanky, director sang Police Regional Office 6, iya ginpahayag nga ang nasambit nga mga kandidato ang naghalin sa Iloilo.
Suno kay Wanky, gin-endorso na nila sa Philippine National Police (PNP) National Headquarters ang hingyo sang mga kandidato.
Nagapanguna nga rason sang mga ini amo ang nabaton nila nga pamahog sa ila seguridad.
Ang PNP Intelligence Group naman ang magapatigayon sang assessment.
Ang exemption sa election gun ban ang aprubahan naman sang Committee on Ban on Firearms and Security Concerns sang Commission on Elections (COMELEC).
Sa tion nga mapasugtan nga ma-exempt sa election gun ban, mahimo ang mga ini nga makadala sang armas bilang proteksyon sa ila kaugalingon.
Nahibaluan nga bilang general rule, ang bona fide police, military, kag myembro sang government law enforcement agencies nga may complete uniform kag yara sa official duty ang indi sakop sang election gun ban sa bug-os nga election period.
– 𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗛𝗮𝗻𝗻𝗮 𝗝𝗼𝘆 𝗔𝗻𝗱𝗮𝘀𝗮
