Nagpanindugan ang Philippine National Police (PNP) nga indi na kinahanglan ang “loyalty check” sa sulod sang organisasyon apisar sang pahayag ni Senate President Panfilo “Ping” Lacson nga may tuyo nga kudeta nga suportado sang uniformed personnel.
Suno kay Brig. Gen. Randulf Tuaño, spokesperson sang PNP, nagapabilin nga apolitical ang PNP kag indi ini mag-intra sa anuman nga espekulasyon sa pulitika.
Pahayag sini, nagapabilin ang ila mayor nga mandato nga amo ang pagpasiguro sang kalinong kag katawhay.
Indi na kinahanglan ang loyalty check suno sa iya bangud solid ang ahensya sa idalom sang liderato ni PNP Chief Gen. Jose Melencio Nartatez Jr.
Ginpasiguro man sini nga nagapabilin sila nga tampad sa Konstitusyon.
Matandaan nga sang weekend, ginsiling ni Lacson nga may retirado nga mga opisyal nga nagatinguha nga maka-recruit sang mga myembro sang Armed Forces of the Philippines (AFP) agud nga magpatigayon sang kudeta. Nagapati si Lacson nga mapalpak ang amo nga plano.
Una na nga ginpahayag sang PNP nga wala sang validated nga “credible or imminent” threat apang nagapabilin ini nga aligmat ukon alerto sa anuman nga security concerns.#
 nga indi na kinahanglan ang "loyalty check" sa sulod sang organisasyon.){kind=link}