Naghalin na ang monster ship sang China Coast Guard (CCG) sa kadagatan nga sakop sang Zambales apang may nagbulos nga isa na naman ka Chinese ship.
Kahapon, Enero 8, sang nag-amat-amat biya ang CCG vessel 5901 nga amo ang pinakadaku nga Coast Guard vessel sa kalibutan.
Suno sa Philippine Coast Guard (PCG), ulihi ini nga nakit-an sa kalayuon nga 90 nautical miles halin sa shoreline matapos ang apat ka adlaw nga pagtinir sa area nga 60 nautical miles ang distansya halin sa baybayon sang Zambales.
Inoras pa lang ang nakaligad, nag-abot ang isa na naman ka barko sang China nga CCG-3103 nga ginpadala sang Beijing halin sa Guangdong Province.
Nagposisyon ini 60 nautical miles halin sa Pandaquit, Zambales nga amo man ang area nga nabakante sang naghalin ang monster ship.
Suno kay PCG spokesperson Jay Tarriela, nagapati sila nga ginbulos ini sang China para masustiner ang ila iligal nga presensya sa sulod sang exclusive economic zone sang Pilipinas.
Nagkadto naman ang PCG Islander aircraft para makumpirma ang presensya sang bag-o nga barko kag sunod man nga ginpadala ang PCG vessel BRP Cabra agud ma-monitor kag maradyuhan ang barko bangud sa paglapas sa sovereign rights sang Manila.
Nahibaluan nga ini nga presensya sang monster ship kag isa pa ka barko ang kasunod man sang December 4 incident kun sa diin sa una nga bes, may duha ka Chinese warships (People’s Liberation Army Navy vessels) nga nagbalabag kag nag-ikog sa barko sang PCG sa Scarborough Shoal (Bajo de Masinloc).
