Nagdangat sa 63% ukon ginabanta 17.4 million ka mga pamilya sa Pilipinas ang nagakonsiderar sang ila kaugalingon bilang pigado.
Santo ini sa resulta sang Social Weather Stations (SWS) survey nga ginpatigayon sang Disyembre 12-18, 2024.
Ginapakita sini nga ang porsyento sang Self-Rated Poor Families ang nagsaka sang kuatro porsyento halin sa 59% nga na-rekord sang September 2024.
Suno pa sa SWS, ang resulta sang Disyembre amo na ang pinakamataas nga porsyento nga na-rekord sa sulod sang 21 ka tuig halin sang nakuha ang 64% sang November 2003.
Sa sini nga survey, nakasaad man nga 10% ang bag-o lang nagkabig sa ila pamilya nga pigado ukon mga non-poor ukon indi pa pigado sang isa tubtub apat ka tuig ang nagligad.
11% naman sang Filipino families ang nagasiling nga borderline sila ukon yara sa tunga-tunga sang klasipikasyon sang pigado kag indi pigado. 26% naman ang nagsiling nga indi sila pigado ukon “not poor” families. Mas manubo ini sa 28% nga narekord sa kaangay man nga survey sang September 2024.
Suno sa survey firm, pinakamataas ang self-rated poverty sa Mindanao nga may 76%, ginasundan sang Visayas nga may 74%, Balance Luzon nga may 55%, kag Metro Manila nga may 51%.
Ini nga non-commissioned survey ang ginapatigayon sa 2,160 adults sa Balance Luzon, Metro Manila, Visayas, kag Mindanao paagi sa face-to-face interviews.
Ang sampling error margins amo ang ±2% sa national percentages, ±3% sa Balance Luzon, kag tag±5% para sa Metro Manila, Visayas, kag Mindanao.
