Ginhatagan ni US President Joe Biden si Pope Francis sang Presidential Medal of Freedom nga amo ang pinakamataas nga civilian award nga ginahatag sang presidente sang Estados Unidos sang Amerika.
Ginpili ni Biden ang Santo Papa bangud amo ini suno sa iya ang nagaserbe nga kasanag sang pagtuo, paglaum, kag may pagpalangga nga nagabanaag para sa kalibutan.
“A loving pastor, he joyfully answers children’s questions about God. A challenging teacher, he commands us to fight for peace and protect the planet. A welcoming leader, he reaches out to different faiths. The first pope from the Southern Hemisphere, Pope Francis is unlike any who came before,” kabahin sang statement sang White House.
Dugang sini, “Above all, he is the People’s Pope — a light of faith, hope, and love that shines brightly across the world.”
Personal kuntani nga ihatag ni Biden ang amo nga medalya kay Pope Francis sa Roma nga amo man kuntani ang iya katapusan nga overseas trip bilang presidente sang US.
Apang wala ini nadayon sa pagbyahe bangud ginpasulabi sini ang pag-monitor sa wildfires sa Los Angeles, California.
Suno sa White House, ginpalab-ot na lamang ang award paagi sa phone call kag nag-istoryahanay man ang Santo Papa kag ang US president kun paano maduso ang kalinong.
Ini ang isahanon nga Presidential Medal of Freedom nga ginhatag ni Biden sa iya pagpungko bilang presidente.
Nahibaluan nga sa Enero 20, magabiya na ang Catholic president sa White House kag magabulos — ukon magabalik — si US President-elect Donald Trump.
Samtang manugtapos na ang termino sang Democrat, daku nga pagpanghangkat ang natabo sang nagluntad ang lapnagon nga wildfires sa Los Angeles nga wala pa gihapon napalong. 11 na ang kumpirmado nga patay kag 13 ang ginapahayag nga missing.
