Tumalagsahon na lang subong ang mga naga-trabaho pa sa edad nga 70 ukon 80-anyos pasaka.
Masami abi nga madamo na ang ginabatyag sang aton nga lawas pag-abot sa sini nga edad.
Apang mang-abaw-abaw ka sa isa ka Lola nga 100-years old na apang nagatrabaho pa sa isa ka kumpaniya.
Didto ini sa isa ka home depot sa Louisville, Kentucky.
Si JoCleta Wilson nga ginbun-ag sadtong Oktubre 4,1924 sa amo man nga lugar amo man ang pinakatigulang nga empleyada sang kumpaniya.
Tuman kalayo ang iya trabaho subong sa iya anay karera sang mapagros pa siya nga amo ang professional dancer kag isa man ka businesswoman.
Pero okay lang sa iya bangud indi man adlaw-adlaw ang iya trabaho subong. 6:00 sa aga tubtub sa 10:00 sa aga ang iya shift sa sulod sang duha ka adlaw sa kada semana.
Bangud energetic siya kag malipayon nga klase sang Lola, madamo nga customer ang indi makapati nga 100 anyos na gali ang iya edad.
Madamo gid ang nagapalangga sa iya gani sa iya milestone birthday, magarbo ang iya birthday party sa balay, may duha ka piano players, may malapit sa 100 guests, kag may separado pa gid nga pa-party ang company para sa iya.
Ginpakigbahin man ni Lola JoCleta nga tatlo ka beses na siya nga nag-retiro sa lain-lain nga mga tion apang indi siya makasaho nga wala sang gina-obra sa ila balay gani nga nagapangita siya sang trabaho nga sarang siya makapakig-abyan kag makapangilala sa iban nga mga tawo.
Isahanon lamang ini sa iya balay kag siya man ang nagaluto sang iya pagkaon.
Naghatag man ini sang panugyan nga masami magsaot, bangud kun gina-obra niya ini sa dance floor, feeling niya, 39 years old lamang ang iya nga edad.
