Wala gihapon sa bungog sang China ang mga pag-radyo kag pagprotesta sang Pilipinas matapos nag-abante pa ang Chinese monster ship kag nagapalapit sa baybayon sang Zambales.
Kahapon lamang, nagradyo liwat ang BRP Gabriela Silang sa China Coast Guard vessel 5901 ukon sa ‘monster ship’ bangud sa iligal nga aktibidad sini sa West Philippine Sea.
Ulihi ini na-monitor sa kalayuon nga 60-70 nautical miles halin sa coastline sang Zambales nga maathag katama nga sulod sa exclusive economic zone (EEZ) sang Pilipinas.
Suno sa Philippine Coast Guard (PCG), nagpaguwa sila sang radio challenge agud nga kumprontahon ang China kag ipahanumdom sa ila nga teritoryo ini sang Pilipinas.
Importante suno sa PCG nga mahibaluan nga sa idalom sang United Nations Convention on the Law of the Sea (UNCLOS), ang freedom of navigation para sa foreign-flagged vessels wala nagakahulugan nga pwede man maka-conduct sang maritime patrols ang foreign vessels sa exclusive economic zone sang iban nga states ukon pungsod.
Kun basehan ang report sang PCG, ini na ang pang-15 nga adlaw nga na-monitor ang monster ship sa teritoryo sang Pilipinas.
Una ini nga nasiplatan sang Enero 4 kag naka-file naman sang diplomatic protest ang Philippine government apang wala nagasapak ang Chinese vessel. Ini nga aktwasyon sang China ginakabig nga paglapas sa Philippine Maritime Zones Act, United Nations Convention on the Law of the Sea (UNCLOS), kag 2016 Arbitral Award.
