Ginaduso sang Commission on Elections (Comelec) ang criminalization sang nuisance candidacy ukon ang mga kandidato nga ginakabig nga pasabad-sabad lamang sa eleksyon.
Suno kay Comelec chairman George Garcia, kun indi man pagkapreso ang ila atubangon, dapat nga madagdagan sila sang multa bilang penalidad.
“Kung hindi kulong, dapat patawan ng multa bilang parusa,” suno sa poll body chief.
Ginkomento ini ni Garcia matapos ang desisyon sang Korte Suprema nga ipauntat ang disqualification batok kay senatorial aspirant Subair Guinthum Mustapha, anay Caloocan City Representative Edgar Erice, kag iban pa nga indibidwal sa May 2025 national and local elections.
Bangud sa nagguwa nga ruling, kinahanglan nga untaton sang Comelec ang pag-print sang official ballots agud nga malakip ang ila nga mga pangalan.
Bangud sini, wala na sang pulos kag mabasura na lang ang anum ka milyon nga mga balota nga nauna na nga gin-imprinta sang poll body.
Sa press statements sang Supreme Court sang Biyernes, ginsiling man nga ginpauntat man sini ang Comelec sa pagpatuman sang ila nga desisyon batok sa tatlo ka local aspirants sa May 2025 elections.
Paathag naman ni Garcia, sa idalom sang Omnibus Election Code, ang nuisance candidacy ang makabig nga “legal” kag “constitutional” issue. Suno pa sa natungdan, dapat nga i-update na ini nga election code bangud wala na ini nagasanto sa automated election.
“May disconnect na ang batas natin na umiiral, sa ating ipinatutupad na automated election,” suno kay Garcia.
Bisan pa nga mabudlay, ginplastar sang opisyal nga sundon nila ang rule of law gani mangibabaw ang ginmandu sang Korte Suprema lakip na ang temporary restraining orders nga gin-isyu agud paboran ang mga kandidato nga nauna na nadeklarar bilang nuisance.
Nagakinahanglan ang poll body sang P132 million agud nga ma-print liwat ang 6 million nga nabasura nga balota.
