Nagpaandam ang Cybercrime Investigation and Coordinating Center (CICC) nga posible magdamo pa ang mga Pinoy nga mabiktima sang peke nga paghigugma sa Pebrero ukon ang ginabansagan nga “month of love.”
Suno sa opisina, 15 ka mga Pinoy kada adlaw ang ginalantaw nga mahulog sa online love scams sa sini nga bulan.
Paathag ni CICC executive director Alexander Ramos, ang batasan sang mga Pilipino nga mapinalanggaon kag emosyonal amo ang ginahingalitan sang mga suspek sa online modus.
Mahimo suno sa iya ma-program paagi sa artificial intelligence (AI) kun paano mainto ang isa ka tawo kun sa diin papatihon ini sa isa ka pagpalangga kag sunod nga pangayuan sang kuwarta.
Nangin target man ang mga Pilipino sini nga online modus bangud suno kay Ramos, kilala ang mga Pinoy nga mapisan kag madamo sang sinuptan nga kuwarta.
“Sa lahat talaga very emotional tayo palagi and because of this attitude pwede ka na i-program sa (artificial intelligence) kung papaano gagantsuhin ang Pilipino…naka profile na tayo and they know na highly vulnerable tayo and they know masipag ang mga Pilipino kaya maraming ipon kaya tinatarget tayo,” suno sa opisyal.
Lakip sa ginapanugyan sang CICC sa publiko amo nga i-check gid ang profile sang mga tawo nga naga-kontak sa social media kag busision man kun may yara sang naka-tag nga mga laragway.
Dugang sang opisina, ang isa pa ka red flag amo kun nagapangindi ang tawo nga mag-video call. Ang pinakamakaalarma nga senyales amo na ang pagpangayo sang kuwarta ukon ginahaylo ang target victim nga mag-invest sa isa ka bagay.
