Duha na ang ginbawian sang kabuhi sa walo ka mga indibidwal nga sakay sang Mitsubishi Mirage nga nakabunggo sa isa ka wing van truck sa Barangay Tacas, Jaro kaina sang kaagahon.
Ang mga napatay nga biktima amo sanday Rizalyn Anacan, 24-anyos, residente sang Brgy. Cayos, Dumangas kag Kim Joseph Sumaguio, 22, residente sang Sta. Barbara, Iloilo.
Ang driver sang salakyan amo si Joseph Anacan Sumagyo samtang ang driver sang truck amo si Freddie Ceryos.
Sa interview sang Bombo Radyo kay PCol Andy Pava, traffic investigator, iya ginpahayag nga halin sa Mandurriao ang salakyan
samtang halin sa Buhang pakadto sa Tacas ang wing van truck.
Suno kay Pava, base sa nakakita, madasig ang dalagan sang Mitsubishi Mirage kag sang nag-overtake ini sa isa ka puck-up truck, wala ini nakabalik gilayon sa lane kag nakabunggo sa nagasugata nga truck.
Padayon naman nga ginabulong sa ospital ang iban nga sakay sang Mitsubishi Mirage matapos nag-angkon sang kapilasan.
Nahibaluan nga bangud sa impact, wasak gid ang kotse nga ginasakyan sang mga biktima.
