Gin-report sang Philippine Coast Guard (PCG) nga nang-harass ang China Coast Guard (CCG) sa barko sang Pilipinas nga magabulig lang kuntani sa isa ka Filipino fishing vessel nga nagpadala sang distress call halin sa ginabanta 70 nautical miles southwest sang Silanguin Island, Zambales.
Nakalusot man ang vessel sang Pilipinas, apang sa masubo nga bahin, nadiskubrehan nga patay na ang isa ka manugpangisda nga ila kuntani buligan.
Nagtinguha pa ang crew sang BRP Cabra nga magpatigayon sang retrieval operation, apang wala nangin mahapos ang ila nga misyon bangud sa presensya sang barko sang China vessel CCG-3304 nga naga-ikog sa ila.
Magluwas diri, kinahanglan man nga malampuwasan sang PCG personnel ang mga balod nga tres tubtub kuwatro metros ang kataason.
Apisar sini nga mga pagpanghangkat, ginpahayag ni PCG spokesperson for the West Philippine Sea (WPS) Commodore Jay Tarriela nga natigayon nga nadala ang bangkay sa Subic, Zambales.
“To transport the body of the fisherman back to Subic, Zambales, BRP Cabra bravely navigated through the heavy waves to retrieve the deceased using its crane. It is crucial to note that the Chinese Coast Guard vessel CCG-3304, despite being aware of the distress call from the Filipino fishermen, engaged in shadowing that hindered the Philippine Coast Guard (PCG) vessel’s efforts to recover the body,” suno kay Tarriela.
Alas syete kagab-i, ginpadala naman ang BRP Teresa Magbanua agud magpatrolya sa Zambales coast para nga mapasaka ang maritime security batok sa Chinese vessel nga iligal nga naga-patrolya sa exclusive economic zone sang Pilipinas.#
