Nagpamalibad ang Malacañang nga magkomento sa Supreme Court (SC) petition nga nagaduso nga i-nullify ang kontrobersial nga 2025 General Appropriations Act (GAA).
Ang petition nga gin- file ni Davao Representative Isidro Ungab kag former Executive Secretary Vic Rodriguez, ang nagkwestiyon sa ginaalegar nga blank items sa bicameral conference committee report.
Suno kay Executive Secretary Lucas Bersamin, tuman pa ka temprano nga magkomento kag wala pa niya makit-an ang kaundan.
Una na ginkontra sang palasyo ang alegasyon ni anay Presidente Rodrigo Duterte nga ang 2025 national budget ang invalid bangud sa blank items.
Nagdistansya ang Malacañang sa isyu sang blank items sa bicam report, kag ginsiling nga ang amo nga isyu ang internal sa House of Representatives kag sa Senado.
Base sa petisyon nga napetsahan Enero 27, 2025, nabutang nga ang Bicameral Conference Committee nagbilin sang blangko sa report sini natuhoy sa budget allocations para sa National Irrigation Administration, Department of Agriculture, kag Philippine Coconut Authority.
Dugang sang petitioners nga ang budget naglapas sa konstitusyon bangud sa indi paghatag sa education sector sang pinakamataas nga budget allocation.
Ang mga petitioners ginalakipan nanday Rogelio Mendoza, Benito Ching, Jr., Redemberto Villanueva, Roseller Dela Peña, kag Santos Catubay.
Sanday House Speaker Martin Romualdez, Senate President Chiz Escudero kag Bersamin ang respondents.
Suno naman kay Senate President Francis “Chiz” Escudero, ginaabi-abi nila ang pag-file sang petisyon.
Dugang niya, indi dapat ini pagkahadlukan bangud kabahin ini sang demokrasya.
