Nanindugan ang Philippine National Police (PNP) nga makabulig para sa safe nga 2025 national and local elections ang ila nga “Oplan Katok” ukon ang door-to-door campaign nga naga-target sang mga pusil nga may expired na nga lisensya.
Suno kay PNP Chief Police General Rommel Marbil, ini nga inisyatibo ang naga-suporta sa nagapadayon nga election gun ban paagi sa pag-account sa tanan nga firearms kag pagsigurado nga legal ang paghupot sini.
Para kay Marbil, ang Revitalized Katok ang nagapabakod sang ila paninguha nga mapabilin nga hilway sa katalagman ang eleksyon bangud makabulig ini nga indi magamit ang iligal nga mga pusil sa iligal man nga mga aktibidad.
“In the long run, Revitalized Katok strengthens our efforts to keep elections safe, as it prevents unrenewed firearms from being used for illegal activities,” kabahin sang statement sini.
Sa bahin ni Commission on Elections (Comelec) Chairman George Garcia, nagpanawagan ini sa PNP nga suspendihon ang Oplan Katok sa election period bangud mahimo ini makapahog sa iban nga mga botante kag mahimo magamit para sa benepisyo sang iban nga mga kandidato.
“Revitalized Katok is a year-round initiative ensuring firearm holders comply with the law. It is not, and will never be, used for political purposes,” kabahin pa sang statement ni Marbil.
Enero 12 sang nagsugod ang election period. Magalawig ang nationwide gun ban tubtub sa Hunyo 11 ukon isa ka bulan matapos ang May 12 elections.
Sabat ni Marbil sa Comelec, ginapatuman lamang nila ang Republic Act No. 10591 (Comprehensive Firearms and Ammunition Regulation Act), nga naga-require sa firearm owners nga i-renew ang ila lisensya.
Kun mapaslawan sa pag-comply, mahimo ini mag-resulta sa revocation sang firearm privileges kag possible confiscation.
Ginsulit man ni PNP spokesperson Police Brigadier General Jean Fajardo ini nga posisyon, kag nagpaathag nga wala sila sang tuyo nga magpamahog ukon magpang-harass sa kay bisan sin-o.
“Kapag nagpupunta tayo ay unang una, meron tayong official na letter na ipina-rereceive sa kanila kasi base lang ang ating kinakatok ay ‘yun lamang pong mga nakalista sa database natin,” suno kay Fajardo.#
