Natalana nga pasakaan sang reklamo ang isa ka 19-anyos nga lalaki matapos gin-alegar nga naghana kuntani ini nga bun-on ang barangay tanod sa Calumpang, Molo, Iloilo City.
Sa interview sang Bombo Radyo kay Police Captain Ryan Christ Inot, hepe sang Iloilo City Station 4, iya ginpahayag nga ang tanod mismo ang nagdangop sa estasyon agud i-report ang amo nga insidente.
Ginaalegar pasado alas siyete sa gab-i, samtang nagalibot ang mga tanod, naabtan ang grupo sang mga pamatan-on nga hana na nga mag-rambol. Nagsaway ang tanod nga untaton na ang pagbaisay kag paghabuyanay sang botelya, apang nagpaandam pa ang lalaki nga kun magsulong ang tanod, bun-on niya ini kag patyon.
Suno kay Inot, nagpaguwa pa sang kutsilyo ang lalaki apang nakalikaw ang tanod kag nakuha ang patalom.
Ginpahayag nga nagdalagan ang iban nga mga kabataan kag nanghaboy sang botelya, samtang ang isa lang nga may dala ang kutsilyo ang nadala sang tanod kag barangay official sa police station.
Mas maayo gid suno sa hepe nga ma-file ang reklamo agud magtanda ang involved kag indi na maliwat ang kaangay nga gamo kag eskandalo sa barangay.
Matandaan nga sang ulihi nga bahin sang 2024, ginpa-istriktuhan ang curfew compliance sa mga taga-syudad bangud sa sunod-sunod nga mga insidente nga ginakaulamiran sang mga menor-de-edad kag mga pamatan-on.
Naglunsar man anay ang Iloilo City Police Office kaupod ang social welfare offices kag local officials sang Revitalizing Reach-Out and Intensifying Programs for Safety and Welfare of Children and Community for Protection (RE-RAIS for Protection) para nga ma-address ang mga kaangay sini nga vulnerabilities, mapasangkad ang child welfare, kag ma-promote ang mas safe nga mga komunidad.#
