Ginkalipay sang head sang General Services Office (GSO) ang nangin democratic nga pagpatigayon sang community forum sa Brgy. Ingore, La Paz, Iloilo City kaangot sa pagatukuron nga Waste to Energy project.
Sa interview sang Bombo Radyo kay Engr. Niel Ravena, head sang Iloilo City General Services Office, iya ginpahayag nga tinutuyo sang aktibidad ang ipaathag kag ma-eksplekar sa pumuluyo ang bentaha kag disbentaha sang amo nga proyekto.
Suno kay Ravena, sequence of forum pa ang lauman bangud parte ini sang proseso ilabi na ang residente sang amo nga lugar.
Nagalaum man ang natungdan nga maintindihan kag makit-an sang mga residente ang importansya sang ginaduso nga proyekto sang city government.
Nahibaluan nga kon magsugod ang Waste to Energy project sa bag-o nga sanitary landfill sa 2026, ang basura nga ma-dispose ang ipahamtang sa waste to energy machine kag ang city government ang mabayad sang production cost nga P1.70 tubtob P1.80 per kilo sang basura.
Ang energy nga ma-produce halin sa basura ang ibaligya sa Private Public Partnership (PPP) partners sang syudad ilabi na sa mga nagakinahanglan sang kuryente.
