Indi maapektuhan ang preparasyon sang Commission on Elections (Comelec) apisar pa sang impeachment batok kay Vice President Sara Duterte.
Suno kay Comelec chairman George Garcia, isa ini ka political decision kag wala sang labot sa pagpatigayon sang piniliay.
Ginpasalig man sini nga indi sila madisturbo sang bisan ano nga development sa pulitika bangud wala man ini sang implikasyon sang pag-print sang balota, paghanas sa mga manunudlo, kag sa pangkabug-usan nga mga preparasyon.
“Tuloy-tuloy ang paghahanda natin at hindi kami maiistorbo dito sa kaso o sa kahit anong klaseng development sa politika dahil wala itong implication sa pagp-imprenta ng balota, sa pagt-train ng mga guro at sa paghahanda overall sa ating halalan,” pahayag sang nagapamuno sa poll body.
Una na nga ginpahayag ni Sara nga wala siya sang plano nga mag-resign sa iya posisyon bisan gin-impeach siya sang Kamara. Wala man ini sang plano sa 2025 elections apang nagsiling nga handa siya nga magbulig sa Comelec para sa ila nga voter education program.
Gin-abi-abi man ni Garcia ang bulig nga gintanyag sang bise presidente.
“Napakalaking tulong ng lahat ng ahensya ng pamahalaan hindi lang ng Office of the Vice President…sa ating pagsisimula mismo ang pananalita na tayo ay hindi mamimili ng boto, hindi tayo gagamit ng state resources at tatalima sa patakaran ng Comelec. Malaking tulong po yan sa Commission,” dugang ni Garcia.
Sa subong, naka-imprinta na ang Comelec sang 14,747,766 official ballots kasunod sang ila pag-resume sang pag-print sang January 27.
