Ginaplano sang Iloilo City Council nga magtukod sang Task Force nga nagabantay sa public safety, traffic, security, kag mga basura sa Iloilo Sunset Boulevard.
Sa interview sang Bombo Radyo kay Iloilo City Councilor Sedfrey Cabaluna, chairman sang Committee on Public Safety, iya ginpahayag nga kinanhanglan sang ordinansa nga naga-enforce sang mga pagsulundan agud nga mapabilin ang kalimpyo kag kalinon sang Sunset Boulevard.
Suno kay Cabaluna, magakoordinar sila sa pila ka mga opisina kag komitiba sang syudad agud nga mapatuman ang ginaduso nga tikang.
Ginatuyo man sang Committee on Public Safety nga magbutang sang dugang nga bench ukon palahuwayan sa lugar, lakip na ang parking lot kasunod man sang pagdamo sang volume sang salakyan sa lugar.
Una na nga gindumilian sang syudad ang park shot ukon pag-inom sang makahulubog nga ilimnon sa lugar agud malikawan ang disgrasya.
Hugot man nga ginabantayan ang pagbaligya sang mga pagkaon kon sa diin, gina-require ang mga vendors nga magdala sang kaugalingon nga basuran agud nga indi maglapta ang mga basura.
