Nagahanda na ang Thailand matapos napilian nga mangin host para sa 2025 edition sang Miss Universe.
Gin-anunsyo ini sang The Miss Universe Organization matapos ang ginpaguwa nga teaser nga ginpilian man sini ang Spain, Costa Rica, Nigeria, Dominican Republic, South Africa, kag Pilipinas.
Ini na ang pang-apat nga tion nga ang “The Land of Smiles” ang maga-host sa sini nga global pageant. Home country man sini sang isa sa co-owners sang MUO nga si Anne Jakrajutatip sang JKN Global Group.
2018 sang katapusan nga nag-host ang Thailand sa Miss Universe competition kun sa diin ang ginkoronahan amo si Catriona Gray sang Pilipinas.
Sang nagligad nga tuig, ginpatigayon ang pageant sa Mexico nga amo ang home country naman sang isa pa ka co-owner sa MUO nga si Raul Rocha sang Legacy Holdings Group nga naangkon ang katunga sang organisasyon sang nagligad nga tuig.
Sa subong padayon pa ang pagpangita para sa Miss Universe delegate sang Pilipinas kag halos kumpleto na ang roster of candidates.
Lakip sa pinakaulihi nga nagdugang amo ang OG Latina slayer, beauty-queen actress nga si Winwyn Marquez nga magatiglawas sang Muntinlupa City. 32-anyos na si Winwyn kag may duha ka tuig nga bata nga babaye apang sulod gihapon sa pageant bangud wala na sang restrictions nga ginhatag ang organisasyon. Nadag-an sini ang Reina Hispanoamericana title sang 2017 kag amo man ang first Asian woman nga nakakuha sang amo nga distinction.
Pagkatapos nahatag ang bugal sa pungsod, nakit-an man siya sa television shows kaangay sang “Owe My Love” sang 2022, “My Liham ni Urduja” sang 2023 kag ang “Lilet Matias: Attorney-at-Law” nga nagapadayon pa subong.
Palaban man ang pambato sang Taguig City nga amo ang pageant veteran nga si Katrina Llegado. Gintiglawas man sini anay ang Taguig sa Miss Universe Philippines 2022 kag nag-represent man sang Pilipinas sa Reina Hispanoamerica 2019 kun sa diin nagtapos ini bilang fifth runner-up.
Sang nagligad nga tuig, ang nagtiglawas sang Pilipinas amo si Chelsea Manalo nga nakasulod sa Top 30, nangin labing-una nga recipient sang Miss Universe Asia title, kag nakuha man ang Best in National Costume award.
