Nanindugan si former House Speaker Pantaleon Alvarez nga indi politika ang yara sa likod sang ila natalana nga pag-file sang kaso batok kay House Speaker Martin Romualdez kag iban pa nga mga mamalidha.
Pahayag sini, maathag nga nakahimo sang krimen si Romualdez kag iban pa nga kaalyado sini nga mga kongresista bangud sa mga blangko nga items nga ginbutang sa bicameral report kaangot sa 2025 national budget.
Ginpahayag sini nga nahibaluan nila ini sang gin-email sa ila ang report, kag natukiban man nila nga sang ginpirmahan sang president, kumpleto na ang yara sa report sa national budget. Duda man ini kun matawag ini nga typographical error ukon grammatical error bangud nagalab-ot suno sa iya saP241 billion ang kantidad nga yara sa ginapahayag nga blank items.
“Nagulat na lang kaming lahat noong makita namin kung bakit iyon in-e-mail sa amin na bicam report. May mga blangko po rito. Ngunit noong pinirmahan ng presidente, kumpleto na,” pahayag sini sa press conference. “Ewan ko kung matatawag na typographical error ‘yan o grammatical error. Napakalaki po ng halaga, P241 billion.”
“Itong pag-file namin ng criminal cases, hindi po kasama sa politika ito. Malinaw na mayroong krimen na nangyari,” dugang pa sang anay house speaker.
Gindugang man sini nga wala siya sang upod nga congressman sa pag-file sang kaso bangud nahadlok ang iban nga mawad-an sila sang budget sa AKAP kag TUPAD.
Pareho sanday Alvarez kag PDP Laban member Atty. Jimmy Bondoc nga kaalyado sang mga Duterte apang pareho man sila nga nanginwala nga ini nga tikang ang kabahin sang away-pulitika batok sa mga Marcos.
Suno kay Bondoc, ang pag-file sang kaso-kriminal ang separado sa iya pagpadalagan bilang senador. Suno sa iya, naga-akto siya sa kapasidad bilang parte sang legal team sang PDP Laban.
“We are really fighting against the corruption that is nasa institusyon. Wala po itong kinalaman sa politika. Very little to do with politics,” suno sa singer-songwriter kag abogado nga senatorial aspirant sa 2025 elections.
Disyembre 30 sang ginpirmahan ni President Marcos ang P6.326-trillion national budget para sa 2025. Gin-veto sini ang masobra P194 billion nga balor sang line items nga indi consistent sa prayoridad sang iya administrasyon.
Ang una nga nagpalupok sang balita kaangot sa blank items sa budget amo sanday former President Rodrigo Duterte kag Davao City 3rd District Representative Isidro Ungab. Gin-alegar nga may missing budget amounts sa items sa idalom sang Department of Agriculture kag unprogrammed appropriations.
Kasunod sadto, sanday fomer executive secretary kag senatorial aspirant Vic Rodriguez, Ungab, kag iban pa ang naghingyo sa Supreme Court (SC) nga ideklarar ang 2025 national budget bilang unconstitutional.
Sang amo nga tion, una na nga nagpahayag si Marcos nga nagabinutig si Duterte.
