Ginhangkat ni Iloilo City Mayor Jerry Treñas si Former Mayor Jed Patrick Mabilog nga mag-debate sa joint venture agreement (JVA) sang city government kag Double Dragon Properties Corp kaangot man sa Guimaras Iloilo Ferry Terminal (GIFT) Project.
Ini kasunod man sang mga akusasyon ni Mabilog batok sa amo nga tikang sang city government.
Sa interview sang Bombo Radyo kay Mayor Treñas, iya ginpahayag nga dapat sabton man ni Mabilog ang issue sa tion sang iya nga pagpamuno kon sa diin, ginpirmahan sini sang 2012 ang agreement nga nagahatag sa Double Dragon Properties Corp sang eksklusibo nga 25 ka tuig nga kinamatarong sa pagdevelop kag pag-operate sang 13,000-square-meter terminal complex.
Ginkwestyon man ni Treñas kon ngaa tuman gid ka concern ang anay alkalde sa Double Dragon Properties Corporation.
Suno kay Treñas, baseless ang mga akusasyon ni Mabilog kon sa diin, nagbato man ini sang pamangkot kon ang agreement nga ginhimo sang administrasyon sang anay alkalde ang nagasunod sa existing laws sang syudad.
Gin-athag man sini nga ang renegotiation subong nga sa idalom sang Public Private Partnership (PPP) ang nagasunod sa insakto nga proseso.
Ginpunto man ni Treñas nga nagabuligay sila ni Guimaras Governor JC Rahman Nava agud nga mangin madinalag-on ang renegotiation project.
Una na nga ginpahayag sang Committee on Transportation sang City Council nga ang letter sang renegotiation ang mangin epektibo 60 days sugod mabaton sang City Legal Office kag Double Dragon Properties Corp.
Nahibaluan nga halos duha ka tuig matapos gin-umpisahan ang pagrepaso liwat sang Joint Venture Agreement para sa Guimaras-Iloilo Ferry Terminal Services sa Parola Wharf.
Kon balikan, nakasaad sa anay agreement ang 25 year exclusive rights sa pagkolekta sang terminal, berthing and cargo fees, kag ang pagparenta sang mga commercial spaces sa terminal complex.
Sa idalom sang JVA, ang bahin sang syudad naglakip sang 1-5% sang kita sa gross terminal fee, 1% sang gross berthing fee revenues, 1% sang gross cargo fee revenues, kag 1% sang gross rental revenue (wala labot ang VAT).
