Gin-umpisahan ang Oplan Baklas sang Commission on Elections (COMELEC) Iloilo City ang pagpangbaklas sang mga campaign paraphernalia kadungan sang pagsugod sang national campaign period.
Sa interview sang Bombo Radyo kay Mr. Jonathan Sayno, Election Assistant II sang Iloilo City COMELEC, iya ginpahayag nga nagsugod sila pangbaklas sa atubang sang Iloilo Provincial Capitol kag nagderetso sa bahin sang Jaro Plaza.
Suno kay Sayno, lunsay national nga tarpaulins ang nakuha amo kanday Camille Villar, Sen. Imee Marcos, Uswag Ilonggo Partylist, kag iban pa nga national candidates.
Ginpahayag man sini nga kalabanan sa nakuha nga tarpaulins ang wala sang ‘paid for by’ nga pangalan nga isa ka bayolasyon sa pagsulundan sang COMELEC.
Gin-athag man sini nga nakuha nga campaign materials ang mangin inventory kag i-report national nga COMELEC agud makuha ukon maturn-over.
Ginklaro man sang natungdan nga ang paglapas sa guidelines sang mga tarpaulins ang mahimo man mangin grounds for disqualification sa pagpadalagan sa public office.
