𝗜𝗟𝗢𝗜𝗟𝗢 𝗖𝗜𝗧𝗬 – Nagalaom ang Parish Pastoral Council for Responsible Voting (PPCRV) nga mangin dako nga bulig ang voters education module agud magiyahan ang publiko sa responsable nga pagboto sa May 12, 2025 elections.
Sa interview sang Bombo Radyo kay Msgr. Meliton Oso, Director sang Jaro Archdiocesan Social Action Center (JASAC), iya ginpahayag nga katuyuan sang voter’s education module sang PPCRV amo nga ipalab-ot sa tanan ilabi na sa mga volunteers sang organisasyon ang mga padayon nga tikang nga ginahimo sang simbahan sa piniliay sa pungsod.
Suno kay Oso, matapos ang paglunsyar sang voters education module, magapatigayon man sila sang serye sang training agud mapakigbahin sa mga volunteers ang mga ihibalo nga dapat sundon sa pagbantay sa proseso sang eleksyon.
Ginpahayag man sang natungdan nga katuyuan man sang voters education module nga magserbe nga giya sa paghanas sang mga kabataan sa importansya sang demokrasya kag eleksyon.
Nagalaom man ang natungdan nga magpili ang publiko sang mga kandidato nga may matuod nga pag-ulikid sa pungsod kag indi lang para sa personal nga interes.
