Nagbubo ang mensahe sang simpatiya kag pagpakig-unong para sa pamilya kasunod sang hinali nga kamatayon sang 65-anyos nga internationally renowned Filipino chef kag restaurateur nga si Margarita Fores.
Nasapwan ang chef nga wala na sang kabuhi sa sulod sang iya hulot sa hotel sa Hong Kong matapos nga wala ini nakatambong sa isa ka scheduled meeting. Wala sang ginhatag ang pamilya kag pulis nga detalye kaangot sa rason sang iya kamatayon.
“Our family is mourning this unexpected loss, and we kindly ask for your prayers during this time,” pahayag sang iya bata nga si Amando Fores. “We will be able to share more in due time.”
Ginakabig si Fores nga pioneer sa culinary industry kag nagpabantog man sang Filipino cuisine sa iban nga mga iban nga mga pungsod.
Nabun-ag siya sang 1959 sa prominente nga Araneta Family kag nagtubo ang iya passion sa Italian food samtang nagapuyo sa New York.
Sang 1986, naghanas siya sa idalom sang tatlo ka chefs agud nga matun-an ang traditional Italian cooking.
Ginapanag-iyahan sini ang madamo nga restaurants lakip na ang Cibo chain, Lusso, Grace Park, kag Alta.
Sang 2016, ginhingadlan siya nga Best Female Chef.
Nagapabilin ang iya adbokasiya sa organic ingredients kag commitment sa dekalidad nga Italian kag Filipino cuisine nga amo ang naghatag sa iya sang pagkilala halin man sa international circles. Nakilala man siya sa international television shows lakip na sa Inspired with Anna Olson kag Culinary Journeys nga iya sang CNN.
Nangin two-time cancer survivor man si Fores, lakip na ang thyroid cancer nga nalampuwasan sini sang 2006.
