Ginapadayon pa ang imbestigasyon kaangot sa aksidente sa bus sa Guatemala nga nagbilin sang 55 ka mga patay.
70 ang kabug-usan nga sakay sa salakyan nga suno sa local media ginalakipan sang mga estudyante kag commuters nga pakadto sa capital city para sa ila nga medical appointments.
Nahulog ang bus sa pil-as sang Lunes sang aga kag binudlayan pa ang rescuers nga makuha ang mga lawas sang mga biktima sa creek.
Nagdeklarar naman si Guatemalan President Bernardo Arévalo de Leon sang tatlo ka adlaw nga national mourning para dumdumon ang mga biktima kag paghatag man sang simpatiya sa ila nga mga pamilya.
Nahibaluan nga ang normal nga ruta sang bus amo ang San Cristóbal Acasaguastlán kag Guatemala City.
24-anyos ang driver sang bus kag kumpirmado nga nalakip sa napatay. Gina-usisa sang otoridad kun nadulaan ini sang control bangud sa brake failure.
