Gintambakan sang Egypt sang 31-puntos nga abanse ang Gilas Pilipinas sa katapusan nga friendly game sa Doha International Cup sa Qatar.
Pasado alas tres sang kaagahon oras sa Pilipinas sang nagtakop ang hampang sa skor nga 86-55.
Apisar pang-34 ang Pilipinas sa world ranking, wala nasarangan sang national team ang mas dalagku kag mas mataas nga players kag ang outside shooting sang world no. 38 nga kasumpong.
Naka-skor si Justin Brownlee sang 18 puntos, may lima ka rebounds, kag isa ka assist antes ini temprano nga nagguwa sa fourth quarter. Magluwas sa iya, wala na sang player halin sa Gilas nga nakalab-ot sa double figures.
Ini ang pangaduha nga kalutusan sang Gilas matapos ginpierde man sang Lebanon kahapon sang kaagahon, 75-54. Ang isahanon nga nadag-an sang Pilipinas amo ang imbukada nga hampang batok sa host country, 74-71.
Magapauli na ang Gilas diri sa pungsod, mapahuway sang gamay, antes mag-atubang sa Taiwan sa Pebrero 20 kag New Zealand sa Pebrero 23 sa third and final window sang 2025 FIBA Asia Cup qualifiers. Warmup event na lamang ini nga qualifiers bangud kuwalipikado na ang Gilas sa FIBA Asia Cup sa Agusto kasunod sang undefeated record sini sa nauna nga duha ka windows.#
