Ginsaysay ni Iloilo City Mayor Jerry Treñas nga manami sa balatyagon nga makatambong sa Regional Development Council (RDC) kaupod ang pinakamataas nga opisyal sang Pilipinas.
Sa interview sang Bombo Radyo kay Treñas, iya ginpahayag nga lakip sa naistoryahan sa amo nga pagsinapol amo ang Panay-Guimaras-Negros Bridge, Panay River Basin project sa Capiz, Iloilo-Capiz Expressway kag pagpadayon sa konstruksyon sang Jalaur Mega Dam Project.
Suno kay Treñas, sa masobra 35 ka tuig nga pagserbisyo niya sa syudad, ini ang una nga kahigayonan nga nahatagan sang malawig nga tion agud nga maistoryahan ang mga proyekto kaupod ang presidente sang pungsod.
Ginpahayag man sini nga lakip sa naistoryahan amo ang power supply sa Western Visayas.
Nahibaluan nga Pebrero 13, 2025 sang nagpadulong sa Iloilo City si President Ferdinand Marcos, Jr. agud pangunahan ang grand rally sang Alyansa para sa Bagong Pilipinas.
