Matabo subong nga adlaw ang ikaduha nga hearing sang tripartite committee sa Kamara para maistoryahan ang paglapta sang fake news kag disinformation.
28 ka social media influencers kag vloggers ang gindagdagan sang show cause orders para sa sini nga hearing matapos wala nagtambong sa nauna nga inquiry sadtong Pebrero 4.
Lakip sa dalagku nga pangalan nga ginpatawag amo sanday anay press secretary Trixie Cruz-Angeles; former government anti-insurgency task force spokesperson Lorraine Marie Badoy-Partosa; kag ang broadcaster nga si Jeffrey Celiz.
Suno kay Sta. Rosa City Rep. Dan Fernandez nga amo ang overall chairperson sang tripartite committee, importante nga mapasabat ang digital influencers sa ila papel sa pagpalapta sang misleading content.
Gina-insister ni Fernandez nga wala sila sang tuyo nga balabagan ang free speech. Ang tuyo diri suno sa iya amo nga maimbestigaran kun bala ginagamit ang social media agud nga patalangon ang publiko, pakanubuon ang mga institusyon, kag i-facilitate ang pagsulod sang foreign disinformation.
Una na nga nagpaandam ang committee nga ang sin-o man sa vloggers kag content creators nga indi magsunod sa show cause orders ang mahimo magresulta sa dugang nga legal action lakip na ang pag-isyu sang subpoena kag pag-cite in contempt.
Ang nagabug-os sini nga superpanel amo ang committees on public order and safety, information and communications technology, and public information. Gintukod ini agud nga ma-usisa ang nagadamo pa nga mga online disinformation kag fake news.
Lakip sa resource persons subong nga adlaw amo sanday Bangko Sentral ng Pilipinas Governor and Anti-Money Laundering Council Chairman Eli Remolona Jr., Internal Revenue Commissioner Romeo Lumagui Jr., Information and Communications Technology Secretary Ivan Uy kag Philippine National Police chief Gen. Rommel Francisco Marbil.
Ginalauman man ang presensya sang mga representative halin sa ByteDance (TikTok), Google Philippines kag Meta (Facebook/Instagram).
