Suportado ni Senator Ronald “Bato” Dela Rosa ang mga tikang ni Senate President Francis “Chiz” Escudero kaangot sa impeachment trial para kay Vice President Sara Duterte.
Suno sa senador nga kaalyado sang mga Duterte, nakahibalo ang senate president kun ano ang iya ginahimo kag ginatindugan sini kun ano ang iya ginapatihan nga husto.
“I’m following the lead of our Senate President. I presume alam na alam niya yung ginagawa niya… I’m supporting his effort dahil nga, kung baga, pinanindigan niya yung kanyang pinaniwalaang tama at saka yung sinabi niya pine-preserve niya yung integridada ng Senado,” pahayag ni Bato.
Subong nga adlaw sang gin-release ni Escudero ang proposed timetable para sa impeachment trial.
Ini nga proposed calendar ang naka-attach sa sulat nga napetsahan sang Pebrero 24 nga nagalakip man sang Special Order nga amo ang naga-assign sa nagkalain-lain nga Senate offices bilang administrative support sa impeachment court.
Ginpadala ang sulat sa mga senador, kay Duterte, kag kay Speaker Ferdinand Martin Romualdez.
Yari ang ginaproponer nga timetable:
June 2, 2025 – resumption sang session; presentasyon sang prosecutors sang articles of Impeachment; approval sang revised rules of procedure sa impeachment trials (3 pm)
June 3, 2025 – pag-convene sang impeachment court kag oath-taking sang incumbent senator-judges (9 am)
June 4, 2025 – reception sang pleadings
June 24 to July 25, 2025 – pre-trial
July 28, 2025 – inaugural session sang 20th Congress (10 am); joint session sang Congress para sa State of the Nation Address ni President Ferdinand Marcos, Jr. (4 pm)
July 29, 2025 – oath-taking sang newly elected senator-judges sa Senate nga amo ang impeachment court (9 am); plenary session sang Senate (3 pm)
July 30, 2025 – pag-umpisa sang trial (9 am to 2 pm)
Pebrero 5 sang gin-impeach sang Kamara ang bise-presidente. Sang amo man nga adlaw, ginpasa ang Articles of Impeachment sa Senate apang nag-adjourn ang upper chamber nga wala na-istoryahan ang amo nga isyu.
May pending man nga petisyon si Sara sa Korte Suprema nga nagahangkat sa validity sang nasambit nga impeachment complaint.
