ILOILO CITY – Magapahamtang ang Iloilo City Government sang temporary nga mga traffic signs sa Sunset Boulevard.
Ini ang kasunod man sang sunod-sunod nga mga aksidente sa lugar.
Sa interview sang Bombo Radyo kay Retired Police Colonel Uldarico Garbanzos, pinuno sang Iloilo City Traffic and Transportation Management Office, iya ginpahayag nga partial turn over pa lang ang natabo sa proyekto sa tunga sang syudad kag sang Department of Public Works and Highways (DPWH).
Suno kay Garbanzos, nagapadayon pa sa gihapon ang improvement sa lugar sa diin kulang pa ini sang mga traffic signs nga makabulig kuntani sa mga motorista nga makalikaw sa aksidente.
Ginpahayag sang natungdan nga naghimo ang syudad sang inisyatibo sa diin nagpahimo sila sang traffic signs nga na-print sa tarpaulin agud mangin giya sa mga motorista ilabi na sa intersection sa Sooc, Arevalo, Iloilo City.
Sa pihak sini, nagpanugyan man si Garbanzos sa mga motorista nga maghalong sa pagmaneho kag magbahar agud malikawan ang mga aksidente sa dalanon.
