ILOILO CITY – Nagpanawagan ang Department of Public Works and Highways (DPWH) sa publiko nga indi pag-ipaanggid Ungka flyover sa Cabagan-Sta. Maria Bridge sa Isabela.
Sa interview sang Bombo Radyo kay Engr. Sanny Boy Oropel, Director sang DPWH Region 6, iya gin-athag nga wala sang dapat nga kahangaw-an ang publiko bangud lain-lain ang rason sa pag-angkon sang displacement sa duha ka istruktura.
Suno kay Oropel, ang Cabagan-Sta. Maria Bridge ang narumpag sang Pebrero 27, 2025, bangud sa sobra nga kabug-aton sang dump truck nga may dala nga 102 ka tonelada nga mga bato nga lapaw sa gintalana nga kapasidad sang taytay.
Ang 990-meters nga taytay nga may four lanes, ang gintukod sa balor nga P1.225 billion.
Anom ka indibidwal ang pilason, lakip na ang isa ka bata.
Samtang, ginpasigurado naman ni Oropel nga nag-agi sa maid-id nga pagtuon kag inspeksyon ang Ungka Flyover antes ini liwat nga ginbuksan sang Disyembre 23, 2024.
Matapos ang jet grouting activities, ginpatigayon ang seismic analysis, surveys, kag iban pa nga teknikal nga pagpanalawsaw agud masigurado ang kapag-on sang istruktura.
Ang Ungka Flyover, nga may kalabaon nga 453.7 metro kag four lanes ang gindinisenyo agud mahagan-hagan ang trapiko sa Sen. Benigno Aquino Jr. Avenue kag President Corazon Aquino Avenue.
Matapos ini ginbuksan sang Setyembre 2022, temporaryo ini nga ginpasirado makaligad ang duha ka semana bangud sa isyu sang vertical displacement.
Ang ginhimo nga pagkaayo ang nagabalor sang P300 million, sa diin halos P1 billion na ang kabug-usan nga gasto sa proyekto.
Sa subong, ginadumilian sa gihapon nga maglabay ang pila ka sahi sang salakyan kaangay sang dump trucks, transit mixers, wing vans, trailer trucks, motorsiklo, traysikol, kag bisikleta.
Ginalauman nga matapos ang mga railing, metal cladding, pagkakas sang shoring, kag asphalt overlay sa Marso 15, 2025.
-𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗟𝘆𝗻𝗱-𝗖 𝗕𝗮𝗱𝗲
