Ginkumpirma sang Central Intelligence Agency (CIA) nga gin-utod sang Estados Unidos ang pag-share sini sang intelligence ukon intel sa Ukraine.
Isa ini ka daku nga tikang nga ginalantaw makaapekto gid sa abilidad sang militar sang Kyiv nga ma-igu ang ila gina-target nga pwersa sang Russia.
Ang nagkumpirma sini amo si CIA Director John Ratcliffe, apang indi klaro subong kun tubtub san-o ang amo nga tikang.
May mga nagasiling nga magabalik man ini gilayon ilabi na kasunod sang sulat ni Ukrainian President Volodymyr Zelenskyy kay President Donald Trump kun sa diin nagpabutyag ini sang kahandaan nga mag-negosyar na sa gyera sa tunga sang Ukraine kag Russia.
“You saw the response that President Zelensky put out,” suno kay Ratcliffe. “So I think on the military front and the intelligence front, the pause that allowed that to happen, I think will go away.”
Nahibaluan nga halin sang 2022, nagahatag ang US sang importante nga mga intel sa Ukraine lakip na ang critical information nga kinahanglan sang ila military sa ila gina-target nga pwersa.
Kasunod sang mga development sini nga sinemana lakip ang pagbaisay nanday Trump kag Zelensky, gin-athag ni US National Security Adviser Mike Waltz nga nag-isol ang US kag nagrepaso sang tanan nga aspeto sang ila nga intelligence relationship kaupod sa Ukraine.
“We are pausing, assessing, looking at everything across our security relationship,” suno kay Waltz.
Ginsiling man sini nga padayon ang ila pagpakig-istorya sa Ukraine sa pagpadayon sang negosasyon sa minerals deal kag sa potential peace deal sa Russia.
