Ginaplano sang Iloilo nga magdeklara sang state of calamity bangud sa makaalarma nga pagtaas sang kaso sang dengue sa probinsya.
Sa interview sang Bombo Radyo kay Iloilo Governor Arthur Defensor Jr., iya ginpahayag nga ang ang rason sang deklarason amo bangud agud magamit ang quick response fund subong nga tuig.
Suno kay Defensor, gamiton ini sa pagbakal sang mga kagamitan nga mahimo magamit sa pagtapna sang pagduging sang mga lamok.
Ginpahayag man sini nga ang numero sang mga napatay sa dengue padayon nga nagataas, sa diin may anum na ka napatay.
Ang pinakaulihi nga biktima amo ang 47-anyos nga lalaki gikan sa banwa sang Carles.
Ginpasalig sang gobernador nga ang mga logistics pareho sang dengue test kits, intravenous fluids, kag bed spaces sa 13 ka mga ospital sa distrito, ang may sarang agud ma-handle ang sitwasyon.
Santo sa Provincial government data, 803 na ka kaso ang nabalhag halin Enero 1 tubtob Marso 1 subong nga tuig, kon sa diin, 77% nga pagtaas kon ipaanggid sa amo man nga panahon sang 2024, nga yara lamang sa 454 ka kaso kag duha ang napatay.
Nahibaluan nga ang nauna nga lima ka narekord nga napatay amo ang duha ka tuig nga bata nga babaye halin sa Tigbauan; isa ka anum ka tuig nga bata nga lalaki gikan sa Pototan, isa ka 11 ka bulan nga lapsag nga lalaki nga taga-Oton, isa ka 67-anyos nga babaye nga taga-Pototan, kag isa ka 71-anyos nga lalaki nga taga-Carles.
