Natalana nga magbyahe padulong sa Netherlands si Vice President Sara Duterte agud makig-istorya sa mga abogado kasunod sang pagkaaresto sa iya amay nga si former President Rodrigo Duterte.
Suno kay VP Sara, ginsiling sang ila abogado nga in charge sa kaso sang anay presidente sa International Criminal Court (ICC) nga ang sahi sang pagkaaresto sa anay Philippine leader ang wala pa nahimo sang una kag isa ini ka kabuangan.
Pahayag niya, may yara na sila sang arrangements bangud kinahanglan niya nga istoryahon ang mga abogado kun sa diin man dal-on ang anay presidente.
Nanindugan man ini nga wala dapat ginpagwa sa Pilipinas ang iya amay kag ginsiling nga base sa nakabutang sa rules sang ICC na ang defendant ang dapat nga dal-on sa local court kag ang proseso diri ang dapat sundon para iimplement ang warrant.
Ginpakamalaot man sini si President Ferdinand Marcos Jr. bangud sa ginaalegar indi pagtuman sa promisa nga indi magkooperar ang iya administrasyon sa ICC, nga amo ang naga-imbestigar sa extrajudicial killings nga nakumiter sa idalom sang pagpamuno ni Duterte.
Gintawag man sini nga isa ka sahi sang state kidnapping ang natabo sa iya amay kag naggwa nga ang Pilipinas ang nangin “doormat” para gamiton sang iban nga pungsod.
