Ginaduso sang abogado nagikan sa isa ka human rights and public interest advocacy group nga dapat nga Pilipino man ang magatindog nga legal counsel para sa drug war victims kun mag-umpisa na ang trial sa International Criminal Court (ICC).
Sa interview sang Bombo Radyo kay Atty. Gilbert Andres, executive director sang Center for International Law (CenterLaw) – Philippines nga yara subong sa The Hague, iya ginpahayag nga kun Pinoy ang abogado, may yara ini sang mabakod nga koneksyon sa mga biktima sang drug war.
Suno kay Andres, mas mahangpan man sang abogado nga Pinoy ang kultura sa Pilipinas, ang konteksto sang war on drugs, kag kun ano ang “trauma” kag mga eksperyensya sang mga biktima.
Magluwas diri suno sa iya, indi pa mabudlayan sa lenggwahe sa pareho nga Pinoy bangud nga sa Netherlands himuon ang trial.
Mas mahapos man suno sa iya nga ma-update gid ang mga Pilipino kun ano ang dalagan sang kaso, kun ano ang mga pagpanghangkat sa trial, kag iban pa nga ginahambalan sa The Hague.
Ginpahangop sini nga gina-appoint sang korte ang mangin legal representative sang mga biktima, kag may kondisyon nga ang abogado ang dapat nga yara sa listed counsel sang amo nga international tribunal.
Sa Pilipinas, lima gid lamang ang abogado nga yara sa sini nga listahan. Sa idalom sang CenterLaw Philippines, may yara sang duha ka accredited nga abogado sa ICC lakip na si Atty. Andres.
Yara man sa lima si former Presidential spokesperson Atty. Harry Roque nga matunog nga supporter ni former President Rodrigo Roa Duterte.
Sa nakaandan man suno kay Atty. Andres, posible nga isa tubtub tatlo lang ka drug war victims ang pasugtan nga makapungko bilang mga testigo sa korte.
Yara na subong si Duterte sa detention facility sang ICC matapos ini naaresto sa Pilipinas sang Martes sang aga bangud sa gahum sang arrest warrant sang international tribunal bangud sa ginaalegar nga crimes against humanity nga iya nakomiter kadungan sang pag-implementar sang kontrobersyal nga war on drugs campaign.#
