Ginabantayan na sang tanan ang una nga pag-atubang ni former President Rodrigo Duterte sa Pre-Trial Chamber I sang International Criminal Court (ICC).
Patigayunon ini alas-9 karon sa gab-i sa oras sa Pilipinas.
Ang hearing ang pangunahan nanday Judge Iulia Antoanella Motoc (Romania), kaupod sanday Judge Reine Adélaïde Sophie Alapini-Gansou (Benin) kag Judge María del Socorro Flores Liera (Mexico).
Sa interview sang Bombo Radyo kay Atty. Nestor Jeremy Moreno, professor sa University of San Agustin College of Law, iya ginpahayag nga sa Pre-Trial Chamber I ipahibalo kay Duterte ang mga kaso nga ginpasaka sa iya, ang iya kinamatarong bilang akusado kag ang schedule sang mga masunod nga mga hearing.
Ginalauman man nga kuwestyunon sang depensa ang jurisdiction sang ICC bangud naghalin na ang Pilipinas sa international tribunal sang 2019.
Suno kay Moreno, apisar ginalauman nga magadugay pa ang hearing sa ginapangatubang sini nga kaso, may posibilidad man nga makabalik si Duterte sa Pilipinas sa tion nga mapamatud-an nga wala ini sang sala ukon magdesisyon ang ICC nga wala ini sang jurisdiction sa kaso.
Sa subong, nagapabilin si Duterte sa detention unit sang ICC sa Scheveningen sa diin kabahin ini sang Dutch prison.
