Nagpasar si Iloilo City Councilor Candice Tupas, chairperson sang Committee on Public Information, sang ordinansa nga nagahingyo sang paghimo sang official website para sa Iloilo City Government.
Sa interview sang Bombo Radyo kay Councilor Tupas, iya ginpahayag nga pasado na sa first reading ang ordinansa nga may katuyuan nga maghimo sang website nga amo ang mahimo lantawon sang mga pumuluyo para sa mga updates sa syudad.
Suno kay Tupas, ini agud nga malikawan nga mabiktima sang fake news ang publiko.
Ini ang may kaangtanan sa naglapta nga Facebook post nga nagasiling nga nag- organisar sang candle lighting ang syudad para kay anay presidente Rodrigo Duterte.
Pahayag niya, indi madali-dali nga ma-hack ang website gani mas masaligan ini nga source sang impormasyon.
Plano naman ni Tupas nga i-incorporate sa website ang e-library agud nga mas accessible sa mga tawo, ilabi na sa mga estudyante, ang mga libro nga ila kinahanglan nga mabasa.
Nagpahanumdom man ini sa publiko nga indi gilayon nga magpati sa mga post nga makit-an sa social media kag usisaon gid sang maayo ang mga impormasyon.
