ILOILO – Ginpakigbahin sang isa ka Ilongga ang masakit nga kamatuoran sa iya nagligad sa diin ginbaligya siya sa balor nga P700 sang 11 months pa lang siya.
Ini amo si Mae Joy Amora, 28, residente sang Barangay Cubay, Jaro, Iloilo City.
Sa interview sang Bombo Radyo kay Amora, iya ginpahayag nga ginbaligya siya sang iya iloy sang 1996 kag gin-adopt ni Virginia Amora nga isa ka laon.
Suno kay Amora, isa ka semana matapos ang transaksyon, gindala siya sa Barangay Bantayanan, Tubungan, Iloilo, sa diin siya nagdako.
Sa pihak sang kabudlay nga naagyan, nagapabilin siya nga determinado sa kabuhi.
Bata pa lang siya, nagtuon na siya nga magbaligya sang mga utanon halin sa bukid samtang nagatuon.
Natapos ni Amora sa Victoria Elementary School kag sekondarya sa Lanag Norte National High School sa Tubungan, Iloilo.
Sang 3rd year college ioni, nakilala niya ang iya amay, apang nangin malip-ot lang ang ila pag-istoryahanay sa diin nahibaluan man sini nga may bag-o na ini nga pamilya na sa Negros Occidental kag may anom siya ka mga utod.
Ginpadayon sini ang iya pagtuon sa kolehiyo kag nagkuha sang kurso nga Bachelor of Science in Office Administration sa Cabalum Western College, sa diin nakatapos ini sang 2018.
Matapos ang graduation, ginbaton siya gilayon sa trabaho sa kaangay man nga kolehiyo.
Matapos sini, nagtrabaho siya sa isa ka call center sa sulod sang duha ka tuig antes nagpadulong sa Singapore bilang domestic helper kag tutor humalin sang 2022 tubtob 2024.
Nagalaom man si Amora nga magaserbe nga inspirasyon ang iya istorya sa mga kabataan nga gin-adopt, apang naninguha sa pangabuhi.
