Ginkumpirma sang Pavia Municipal Police Station nga nadakpan na sa hot pursuit operation ang suspek sa pagluthang-patay sa isa ka barangay tanod sa Barangay Amparo, Pavia, Iloilo.
Ang biktima amo si Carmelino Minor, Jr., 52, residente sang nasambit nga barangay; samtang ang gin-aresto naman sang kapulisan amo si Regie Gaborno, 41, residente man sang amo nga lugar.
Base sa spot report sang police station subong gid lamang nga kaagahon, nakuha man sa suspek ang isa ka caliber .45 pistol nga may magazine nga may unod nga apat ka bala.
Gindala naman sa police station ang suspek para sa booking kag documentation. Ginahanda naman ang nagakaigu nga mga dokumento para ma-file ang criminal complaint nga murder sa Article 248 sang Revised Penal Code kag violation sang R.A. 10591 (Comprehensive Law in Firearms and Ammunition) paagi sa inquest proceedings.
Matandaan nga pasado alas nueve sang gab-i sang Sabado sang natabo ang shooting incident.
Base sa Pavia MPS, ginpatigayon nila ang follow-up operation paagi sa backtracking, pagtipon sang mga impormasyon halin sa confidential informants, nagtipon sang mga testimoniya, tubtub nga na-identify kag natultulan kun sa diin ang suspek.
Wala pa ginhinambit sa report kun ano ang ginalantaw nga motibo sa krimen.
Santo sa nauna nga interview sang Bombo Radyo kay Kagawad Romar Gaborno, Chairman sang Peace and Order sa nasambit nga barangay, ginahayag sini nga una nga bes kuntani sang biktima nga mag-duty sa namatyan antes ginpatay sang Sabado.
Nagahamyangon ini sa kahilamunan sang nasapwan kag may igo na sang bala sa nawala nga dughan.#
