Nagpahanumdom ang isa ka dermatologist sa publiko kaangot sa benign skin growths ukon mga bukol sa panit nga indi cancerous.
Sa interview sang Bombo Radyo kay Dr. Cecilia Uy, fellow sang Philippine Dermatological Society, iya ginpahayag nga natural nga nagabag-o ang panit samtang nagatigulang kag nagaka-expose sa adlaw, balatian, trauma, kag iban pa nga environmental factors.
Suno kay Uy, ang benign skin growths amo ang discoloration ukon pigmentation disorders bangud sa pagbag-o sa normal nga function sang panit.
Gin-athag sini nga indi tanan nga benign skin growths ang nagakinahanglan sang pagbulong.
Apang nagakadapat sa gihapon nga magpakonsulta sa dermatologist, ilabi na kun nagaresulta ini sang physical discomfort ukon psychological distress.
Apisar kadam-an sa mga nunal ukon bukol sa panit ang indi delikado, nagpaandam ang doktor nga ang pila sa mga ini ang mahimo madagdag sa melanoma, isa ka delikado nga sahi sang skin cancer.
Ginapanugyan man sang natungdan nga agud malikawan ang anuman nga kahangawa, mas maayo nga magpadulong sa mga lisensyado nga dermatologist.
