Nangin mainit ang diskusyon sa tunga nanday Senator Bato dela Rosa kag Justice Secretary Jesus Crispin Remulla kadungan sang ikatatlo nga hugnat sang hearing sang Senado kaangot sa pag-aresto kay former president Rodrigo Duterte kag pagdala sa iya sa The Hague, Netherlands.
Sa hearing, gin-usisa ni Secretary Remulla si Senator Dela Rosa kun nakasabat ini sa communications halin sa International Criminal Court (ICC).
Diri kag nagpanindugan si Senator Dela Rosa nga indi siya magsabat sa ICC bangud ang gobyerno mismo ang wala nagakilala sa international court.
“Bakit ko kakausapin? Sinabi mo na nga na hindi niyo nirerecognize ang jurisdiction ng ICC.”
Gin-akusaran man ni Secretary Remulla sanday Senator Dela Rosa kag Senator Imee Marcos nga nagapang-bully kag ginapilit nga mag-ako sa mga bagay nga wala man sang dapat akuon.
“You’re trying to make people admit something they will not admit,” pahayag ni Remulla.
Nahibaluan nga si Senator Dela Rosa ang isa sa mga gina-imbestigaran sang ICC bilang former chief sang Philippine National Police (PNP) nga amo ang isa sa mga implementers sang maduguon nga war on drugs sang administrasyon ni former President Rodrigo Duterte.
