Ginpakigbahin sang isa anay ka altar server ang iya inagihan sa kabuhi nga may kaangtanan sa ikatatlo nga pulong nga โBabayi yari ang imo Anak, yari ang imo Iloy.โ
Suno kay Ana Marie Manate sang St. Martin de Porres Parish, Brgy. Layog, Maasin, Iloilo, nag-graduate siya sa kurso nga Bachelor of Science in Business Administration major in Financial Management sa Colegio De San Jose, Iloilo City.
Ginpakig-ambit ni Manate nga ikaapat siya sa lima ka mag-ululutod, kag sang nagaedad siya sang pito ka tuig nagbulaganay ang iya iloy kag amay.
Ginsaysay man ni Manate nga nagdako siya nga permi wala nagailintindihanay ang iya pamilya sa sulod sang ila panimalay.
Dugang pa ni Manate, sang nagbulagay ang iya mga ginikanan, duha lang sila nga mag-ulutod ang nagpabilin sa luyo sang ila iloy, apang ang iban nag -upod sa ila amay.
Ginpat-pat man sang natungdan nga sa lamharon niya nga edad nasaksihan niya kun paano sakiton sang iya kaparyentihan ang iya iloy, bangud gusto nila nga kuhaon ang iya manghod.
Dako ang pagpasalamat ni Manate sa mahal nga Diyos, bangud sang panahon nga naga-antos ang iya iloy wala gid ini ginpabay-an, ilabi na sa tion nga nakabunggo ang ulo sang iya iloy sang ini ginsakit sang iya mga kaparyentihan.
Nag-abot man sa punto nga nasaksihan mismo sang iya duha ka mga mata nga ang iya iloy nagakanta nga nagaisahanon sa ibabaw sang kampanaryo, kag ginakadlawan ini sang mga tawo nga nakasaksi.
Dugang pa niya, gina-bully na siya sang iban nga mga kabataan, bangud ang iya iloy nagbuang na.
Apang, sa pihak sang iya mga inagihan wala siya nagdula sang paglaom kag mas ginpadako niya ang iya pagtuo sa Ginoo.
Nagapati siya nga paagi sa iya pagpangamuyo sa mahal nga makaako, magaabot gid ang adlaw nga magbag-o ang tanan.
Nag-abot ang adlaw nga nag-ayo ang iya iloy paagi sa healing kag ini may dako sagihapon nga pagtuo sa Ginoo bisan nga ini siya ang nadula sa iya paminsaron.
Sa katapusan, ginpasalamatan ni Manate ang iya iloy bangud nga nangin inspirasyon niya ini nga magpadayon sa pagpangabuhi sa pihak sang kapait nga iya naagihan, kag bisan nga nadula sa insakto sa paminsaron ang iya iloy wala gid ini sila ginpabay-an.
Ang pagtuo kag hugot nga pangamuyo ni Manate ang nagbulig man sa iya agud nga atubangon ang hupang sa iya kabuhi, kag magpadayon sa pagpanglakaton nga puno sang paglaom upod ang iya utod kag iloy.
