Liwat nga nadalasa sang salakyan ang concrete barriers nga nahamtang sa Brgy. Tagbak, Jaro, Iloilo City kagab-i, Abril 21.
Ang driver amo si Alyas Toto, 49, residente sang Kalibo, Aklan.
Sa interview sang Bombo Radyo kay Patrolman John Carl Impreso, traffic investigator sang Traffic Enforcement Unit (TEU), iya ginpahayag nga halin sa Aklan ang driver kag padulong kuntani sa Balantang, Jaro.
Pahayag sang driver, may nasugata ini nga salakyan nga tuman ka silaw ang headlight rason nga wala sini matalupangdan ang concrete barriers sa lugar, kag dugang pa indi ini gawa pamilyar sa lugar.
Base sa inisyal nga assessment sang kapulisan, wala nakainom ang driver kag maswerte nga wala man nasamaran.
Sa kabug-usan, nadalasa ini ang lima tanan ka concrete barriers kag magabalik pa sa opisina sang TEU bwas nga adlaw agud i-settle ini.
Madumduman nga makapila na nga beses nga madalasa ang mga concrete barriers kag ginareklamo sang pila ka mga motorista nga madulom ang lugar.
(Text: Bombo Phauline Pillora)
