Nagdangat sa P1,088,000 nga balor sang suspected shabu ang nakumpiskar sa isa ka lalaki sa drug buy bust nga ginpatigayon sa Barangay Bakhawan Sur, Concepcion, Iloilo.
Ang nadakpan amo si alias Nonoy ukon si alias Lamok, 55, residente sang amo nga barangay, nagatrabaho man bilang isa ka panday, kag ginakabig nga high value individual (HVI).
Sa interview sang Bombo Radyo kay Police Major Dadje de Lima, chief sang Provincial Drug Enforcement Unit (PDEU), iya ginpahayag nga nakuha sa suspek ang 160 grams sang ginapasuni iligal nga droga.
Suno kay de Lima, nadakpan naman anay si alias Lamok sadtong 2019 bangud man sa illegal drugs, nakaguwa sang 2024, apang na-monitor nga nagbalik sa iya iligal nga aktibidad.
Sandig pa sa pag-monitor sang pulis, sa guwa sang Western Visayas nagahalin ang suplay sini, kag ang areas naman nga ginabaligyaan sini amo ang northern Iloilo partikular sa Sara, Concepcion, kag San Dionisio.
Detained na ini subong sa custodial facility sang Concepcion Municipal Police Station.
