Gin-anunsyo sang Vatican ang tradisyonal nga siyam ka adlaw nga mourning period kasunod sang pagtaliwan ni Pope Francis.
Ini nga “novemdiales” ang maga-umpisa sa Sabado nga amo ang adlaw sang lubong sang 88-anyos nga Santo Papa kag magalawig tubtub sa Mayo 4.
Sa sini nga petsa, may yara sang prayer events nga patigayunon adlaw-adlaw sa St Peter’s Basilica.
Ginpahibalo ini sang Vatican kasunod sang pagsapol sang Catholic cardinals agud nga diskusyunan ang masunod nga mga himuon kasunod sang pagtaliwan sang Pope sang nagligad nga Lunes bangud sa stroke kag heart failure.
Wala pa man sang napahibalo nga eksakto nga petsa para sa conclave ukon ang petsa kun sa diin may meeting ang cardinals agud nga mag-eleher sang bag-o nga Santo Papa. Sa kinaandan, matabo ini 15 tubtub 20 ka adlaw kasunod sang iya nangin kamatayon.
