Naglab-ot sa 35,949 ang mga manunudlo nga magaserbe bilang myembro sang electoral board sa Western Visayas para sa national and local elections sa Mayo 12, 2025.
Sa interview sang Bombo Radyo kay Mr. Hernani Escullar, Jr., spokesperson sang Department of Education Region 6, iya ginpahayag nga kabug-usan nga 2,801 ka mga eskwelahan kag 7,337 ka mga classrooms ang gamiton para sa eleksyon.
Samtang may yara naman sang 2,875 ka mga non-teching personnel nga amo ang maga-assist sa mga manunudlo kag dugang nga 2,217 ka iban pa nga mga personnel.
Una na nagpasalig ang Department of Education (DepEd) nga tumanon ang commitment nga siguruhon nga maproteksyunan ang kinamatarung kag kaayuhan sang mga teachers nga magaserbe bilang poll workers.
Suno kay Education Secretary Sonny Angara, sigurohon sang ahensya nga mabayluhan sang pagpasalamat, preparasyon kag paghatag seguridad sa serbisyo sang mga manunudlo para pangapinan ang demokrasya.
