Nagpaguwa sang statement ang Department of Education (DepEd) nga nagakumpirma nga temporaryo nga ginsaylo sa Schools Division Office ang kontrobersiyal nga principal sa Antique nga involved sa toga incident sini lang nga Abril.
Ini ang kasunod sang gin-anunsyo sang Malacañang sang nagligad nga adlaw nga ginpakakas na ni President Ferdinand Marcos, Jr. sa pwesto si Venus Divina Nietes, principal sang Col. Ruperto Abellon National School.
Suno sa DepEd, gin-aprubahan sang Commission on Elections (COMELEC) ang pagsaylo sa principal bangud nga indi man ini makaimpluwensya sa dalagan sang eleksyon sa lugar.
Pahayag pa sang ahensya, sundon sa gihapon ang due process kag ipatuman gid ang nagakaigo nga imbestigasyon sa insidente.
“Sa direktiba ni Pangulong Ferdinand R. Marcos Jr., agad na kumilos si Secretary Sonny Angara at ang pamunuan ng Department of Education ukol sa insidente sa isang graduation ceremony sa Antique. Inalis na sa paaralan ang punong guro. Inaprubahan naman ng Commission on Elections (COMELEC) ang nasabing paglipat dahil di naman ito makaka-impluwensya sa pagsasagawa ng eleksyon sa nasabing lugar,” suno sa ahensya. “Patuloy ang imbestigasyon ng DepEd para sa resolusyon ng reklamo sa principal.”
Samtang padayon ang pagpang-usisa, magapungko anay bilang officer in charge sang eskwelahan ang assistant regional director sang DepEd Western Visayas.
Matandaan nga naglapta sa social media ang video kun sa diin ginpa-uba sang principal ang toga nga suksok sang Senior High School students sa mismo seremonya sang ila graduation. Ginapanindugan sini nga indi ini ang prescribed attire; bangud dapat suno sa principal nga magasuksok lamang sila sang school uniform — butang nga ginkaakig naman sang mga estudyante kag mangin sang iban nga personnel sang eskwelahan.
