Ginkumpirma sang Department of Justice (DOJ) nga may panibag-o nga panumbungon nga napasaka batok kay Davao City 1st District Representative Paolo ‘Pulong’ Duterte.
Ini nga criminal complaint amo ang ginaalegar nga paglapas sa article 265 (physical injuries) kag article 282 (grave threats) sang Revised Penal Code.
Gin-file ini sang 37-anyos nga si Kristone John Patria nga isa ka businessman nga nakabase sa Davao City.
Wala pa sang madamo nga detalye kaangot sa complaint apang nasugid nga natabo ini alas tres sang kaagahon sang Pebrero 23 sa Hearsay Gastropub Bar sa Obrero, Davao City.
Wala man nakapabulong kag nakareklamo si Patria bangud nahadlok ini nga mabalusan, gani nga duha ka bulan pa antes ini nakapasaka sang complaint. Pahayag sini, may video footage sang closed-circuit television camera sa bar nga mahimo makapamatuod sa iya istorya.
Sa statement naman ni Pulong subong nga adlaw, ginsiling sini nga madugay na ang video.
“Sa mga kapatid kong Davaoeño, ngayon may nakita na naman kayong video. Matagal-tagal na itong nangyari. Ah sige lang, nasa sa inyo pa rin ang desisyon kung sino ang inyong ibobotong congressman sa unang distrito. ‘Di ako makikialam,” pahayag sini samtang nagagamit sang lengguwahe nga Cebuano.
Dugang sini: “Sinabihan ako ng abogado na until now inu-authenticate pa nila kung saan galing ‘yung video. So parang nauna ‘yung file niyan, ewan kung sa CIDG ba naunang mag-file sa CIDG ang testimony, ang affidavit sa social media instead sa fiscal. So ‘di ako makagawa ng statement niyan kasi ‘di kami nakatanggap ng dokumento na may nag-file sa akin ng kaso.”
Nagapadalagan siya sa iya third and final term bilang Davao City 1st District representative sa May elections.
Magluwas sa sini nga panumbungon, matandaan nga may pending nga drug smuggling complaint batok kay Pulong kag sa iya bayaw nga si Mans Carpio nga gin-file ni former senator Antonio Trillanes IV matapos gin-tag ang duha nga naangot sa P6.4-billion shabu haul sa Valenzuela City sang 2017.
