Ginpasaka na sa full alert ang status sang Philippine National Police (PNP) epektibo subong nga adlaw, Mayo 3, bilang preparasyon sa May 12, 2025 midterm elections.
Suno kay PNP Chief Gen. Rommel Marbil, 100% na ang pwersa sang ila hanay sa pagbulig para sa piniliay para masiguro nga mangin malinong ini.
Sa record sang ahensya, nagsaka na sa 35 ang numero sang validated election-related incidents (ERIs) kun sa diin nagapanguna ang Cordillera Administrative Region (CAR) nga may 11, Bangsamoro Autonomous Region in Muslim Mindanao nga may walo kag Calabarzon nga may lima.
May yara man sang tatlo ka insidente sa Zamboanga Peninsula, tag-duha sa Western Visayas kag Davao Region, samtang may tag-isa naman sa Ilocos Region, Central Luzon, Eastern Visayas, kag Soccsksargen.
Nauna na nga ginpahayag ni PNP Director for Police Community Relations Maj. Gen. Roderick Augustus Alba nga magapadala ang enforcement agency sang masobra 120,000 personnel agud mabantayan ang masobra sa 37,000 ka voting centers sa nagkalain-lain nga parte sang Pilipinas.
